Tababaraha kooxda Liverpool ee Jurgen Klopp ayuu kasoo yeedhay hadal miisaan culus lehi isaga oo si daacadnimo leh u tilmaamay kooxda uu u arko mida ugu cad cad hanashada horyaalka Premier League xilli ciyaareedkan 2020-21.
Liverpool ayaa ah kooxda difaacanaysa horyaalka balse waxa jira ilaa afar ama shan kooxood oo kale oo aan wali liiska tartamayaasha laga saari karin.
Klopp ayaa aaminsan in kooxda wakhtigan u muuqata mida ugu cad cad hanashada horyaalku ay tahay Chelsea oo horumar badan samaysay isla markaana hoggaanka wakhtigan haysa kaddib guushii 3-1 ka ahayd ee ay Leeds ka gaadhay xalay.
Liverpool ayaa horyaalka ku guuleysatay xilli ciyaareedkii hore markeedii ugu horreysay mudo 30 sano ah iyagoo farqi dhibco ah oo badan ku qaaday.
Reds ayay doorkan haleeleen dhaawacyo waaweyn oo saamayn ku yeelan kara inay u tartamaan horyaalka markale waxaana laga xusi karaa Joe Gomez iyo Virgil Van Dijk oo inta xilli ciyaareedkan ka hadhsan oo dhan maqnaan kara.
Klopp oo ka hadlaya Blues iyo sida ay ugu cad cad yihiin hanashada horyaalka ayaa yidhi “Haddii aan kulamada kubadda cagta daawado wakhtigan kaddib waa Chelsea, aniga ahaan, iyagaa u muuqda kuwa ugu cad cad”
“Iyagu waxay haystaan safka ciyaaryahanada ah ee ugu weyn, ciyaaryahano cajiib ah oo si wanaagsan u wada ciyaaraya kaddib bilaw liita
Kaddib 10 kulan oo ay ciyaareen, Liverpool ayaa imika 1 dhibic ka hooseysa Chelsea oo hoggaanka haysa walow ay waliba kulan baaqi ah oo ay caawa Wolves la yeelan doonaan uu u hadhsan yahay.
