Halyeygii hore ee Manchester United ee Rio Ferdinand ayaa magacaabay xiddigii ugu wanaagsanaa ciyaartoyda Chelsea kulankii finalka Champions League ee ay koobka kaga qaadeen Macnehster City.
Blues ayaa 1-0 kaga adkaatay Manchester City, waxaanay gacanta ku dhigtay koobkeedii labaad ee Champions League ah iyadoo markii ugu horreysay ee ay hanato ay ahayd 2012 oo ay Bayern Munich ka qaadday.
Kai Havertz ayaa dhaliyey goolka madiga ah ee kulanka ee guusha u horseeday Chelsea, taas oo ahayd kubbad uu usoo dhiibay Mason Mount oo uu ka daba-baxay difaaca, isla markaana uu ula tegay goolhaye Ederson oo uu u gooyey, kaddibna goolka oo madhan ku hubsaday.
Rio Ferdinand oo falan-qeeye ka ahaa kulankii xalay isagoo fadhiyey istuudiyaha telefishanka BT Sports ayaa soo xushay xiddigii ugu fiicnaa ciyaarta, laakiin masoo qaadanin N’Golo Kante oo loo doortay xiddigga garoonka, Antonio Rudiger oo difaacis cajiib ah sameeyey iyo Kai Havertz oo ahaa ninka dhuunta u galay difaaca Man City.
Isagaoo ka hadlayay xiddiga ugu fiican ee isaga aragtidiisa, waxa uu Rio Ferdinand yidhi: “Waa in aan ka hadlo qof sida Reece James ah, sababtoo ah waa midhaha kulliyadda da’yarta kooxda.
“Waxa aynu hore in badan uga hadalnay ciyaartooyada, Mason mount iyo Phil Foden, waa sax, laakiin waxay calaamatu su’aal saarnayd isaga (Reece James), kaliya maaha inta uu xidhan yahay shaadhka Chelsea laakiin sidoo kale shaadhka England oo la isweydiinayay miyuu qayb ka noqon doonaa mise maya, sababtoo ah waxa jira ciyaartooyo badan oo difaac midig oo wanaagsan waddankan.
“Maanta, waxa uu bandhig ka sameeyey fagaarihii ugu weynaa, waa uu taagnaa. Aad ayuu u weynaa.”
