Jamaahiirta Chelsea ayaa ka war helay in saxeexdooda cusub ee Ben Chilwell ay suurtogal tahay inuu in muddo ah garoomada ka maqnaado kaddib dhaawac kasoo gaadhay kualnkii xalay England iyo Belgium ay ku kala baxeen 2-0, taas oo Ingiriisku kaga hadheen tartanka UEFA Nations League.
Difaacan bidix ayaa dhowaan kasoo laabtay dhaawac waqti dheer uu ku maqnaa ayaa muddadii uu soo laabtay waxa uu bandhig wanaagsan ka sameeyey garoomada, isagoo 10 ciyaarood oo uu Chelsea u saftay laba gool u dhaliyey, saddex caawimoodna raaciyey, halka lix ka mid ah ciyaarahaasna ay ku dhamaysteen shabaqooda oo nadiif ah.
Daqiiqaddii 38aad ayaa lagu beddelay Bukayo Saka kaddib markii uu dhulka ku dhacay isagoo dhabarka is haya, isla markaana awoodi waayey inuu ciyaarta sii wato.
Dhaawacyada xili ciyaareedkan ayaa la sheegayaa inay yihiin kuwo aad uga badan intii la filayay, waxaana tusaale ah Liverpool oo afarta difaaca ah ee Van Dijk, Joe Gomez Alexander-Arnold iyo Andy Robertson ay ka dhaawacan yihiin, halka ay u raacaan Thiago, Fabinho iyo Henderson oo isaguna xalay waxyeello soo gaadhay.
Chelsea ayaa la filayaa inay maanta warbixin kasoo saarto laacibkan ay 50ka milyan ee Gini kusoo iibsatay xagaagiid howaa, isla markaana qaybtii hore ee xili ciyaareedka dhaawaca kaga maqnaa.
Tababare Frank Lampard ayaa sugaya inta baadhitaanno buuxda lagu samaynayo difaaciisan bidix si ay u helo xogta ugu dambaysa ee inta uu le’eg yahay dhaawaciisu.
Kulankan xalay ee England iyo Belgium waxa kale oo ku dhaawacmay Kabtanka Liverpool ee Jordan Henderson oo muruqa waxyeello kasoo gaadhay, waqtigii nasashadana la beddelay.
