Tababaraha kooxda Chelsea ee Frank Lampard ayaa ahaa mid faraxsan kaddib guushii 4-1 ka ahayd ee ay kooxdiisu ka gaadhay Sheffield United xalay iyagoo goolal ka kala helay Tammy Abraham, Ben Chilwell, Timo Werner iyo Thiago Silva.
Frank Lampard ayaa kulanka kaddib si gaar ah u amaaay garabka weerar ee Hakim Ziyech kaas oo laba caawimo kasoo sameeyay kulankaas loona doortay ciyaaryahankii ugu wanaagsanaa ciyaarta.
Ciyaaryahankii hore ee kooxda Ajax ayaa ku dhibtooday dhaawac jilibka ka gaadhay bilooyinkiisii ugu dambeeyay ee noloshiisa Chelsea balse Lampard ayaa sheegay inuu hadda taam buuxa yahay.
Lampard oo kulanka kaddib saxaafada u warramay ayaa sheegay inuu Hakim Ziyech yahay ciyaaryahan dhammaystiran isla markaana uu kooxda siiyay halis ka duwan intii hore.
Frankie ayaa yidhi “Isagu waxa uu na siiyay cidhif dheeri ah iyo halis midii hore ka duwan, mudo dheer ayuu ka maqnaa kubadda cagta sidaas darteed waxaan filayaa inay dhab ahaan cajiib tahay sida uu kusoo laabtay”
“Isagu waxa uu na siiyay qaab sidii hore ka duwan marka la eego lugta bidix, maaha wax aan in badan soo haysanay sanadahan ugu dambeeyay”
“Waxa jira waxyaabo badan oo ciyaartiisu leedahay, waxaan filayaa sidoo kale shaqadiisa marka uusan kubadda haysan (Inay fiicantahay), shaqada uu kooxda u qabtaa waxay ka dhigan tahay inuu yahay ciyaaryahan aad u dhammaystiran, waxaan rajaynayaa in wax badani ay isaga xagiisa ka iman doonaan”
