Kooxda Arsenal ayaa baraha bulshada gaar ahaan barta Twitter-ka loogu maadsaday inay fasaxeen goolhaye Emiliano Martinez kaas oo xulkiisa Argentina qaab xarrago leh ugu hoggaamiyay inay gaadhaan kulanka kama dambaysta ah ee Copa America.
Kaddib markii uu kulankaas Semi-Final-ka ah ee ay xalay la ciyaareen Colombia kusoo dhammaaday bar-bardhac 1-1 ah, Martinez ayaa saddex rigoore soo badbaadiyay gool ku laadyadii iyadoo Argentina ay guul 3-2 ah ku gaadhay rigoorayaasha.
Messi oo kamid ahaa xiddigaha rigoorayaasha soo dhaliyay isla markaana caawiye ka ahaa goolka uu Lautaro Martinez ka dhaliyay ciyaarta ayaa kulanka kaddib amaanta ka haysan waayay goolhaye Emiliano Martinez.
Leo ayaa Martinez ku sifeeyay mid aan caadi ahayn “Phenomenon” isaga oo dhinaca kale sheegay inay aamineen shabaq ilaaliyaha kooxda Aston Villa.
“Waxaanu haysanaa Emi, kaas oo ah mid aan caadi ahayn” ayuu ugu horreynba yidhi Leo oo ka hadlaya Emi Martinez.
“Waanu aaminay isaga, waxaanu gaadhnay ujeedkayagii ahaa inaanu dhammaan kulamada tartanka ciyaarno haatana Final-ka ayaanu tagaynaa”
Martinez ayaa kaliya bishii hore ciyaaray kulankiisii ugu horreeyay ee xulkiisa Argentina kaddib wacdarro uu ku dhigay Aston Villa iyadoo booska dookha koowaad lagu aaminay ciyaartii ugu horreysay ee Copa America.
