Kooxda Liverpool ayaa ku dhawaaqday saxeexeedii ugu horreeyay ee suuqa xagaaga iyaga ooshaaciyay inay heshiis rasmi ah la gaadheen kooxda Red Bull Leipzig oo ay kala soo wareegayaan daafaca dhexe ee Ibrahima Konate.
22 sano jirkaas ayaa heshiis shan sano ah oo 1-da bisha July ka bilaabmi doona u saxeexay Liverpool isaga oo heshiiska shaqsiga ah la meel dhigay sidoo kalena tijaabada caafimaadka ka gudbay.
Konate oo bogga LiverpoolFc.com la hadlay ayaa sheegay inuu ku faraxsan yahay ku biirista Liverpool balse uu hadda diirada saarayo koobka Euro ee xiddigaha da’doodu ka yartahay 21 sano jirada oo uu France metelayo.
“Anigu dhab ahaan waan ku faraxsanahay inaan ku biiro koox u weyn sida Liverpool” ayuu ugu horreynba yidhi Ibrahima Konate oo dareenkiisa cabiray.
“Dhab ahaan wakhti farxadeed ayay ii tahay aniga iyo qoyskaygaba waxaanan rajaynayaa la kulanka xiddigaha cusub ee aanu isku kooxda nahay, shaqaalaha iyo inaan bilaabo cutubkan cusub”
“Haatan diiradaydu waxa ay saarantahay koobka xiddigaha 21 sano jirada ka yar ee Euro ee aan France u ciyaarayo, laakiin kaddib tartankaas waan ogahay waxaan ku biirayaa mid kamida kooxaha ugu wanaagsan dunida taasi waxa ay i siinaysaa dareen cajiib ah”
Konate ayaa ku biiraya Reds kaddib afar xilli ciyaareed oo uu ku qaatay RB Leipzig oo uu 95 ciyaarood usoo ciyaaray isla markaana afar gool usoo dhaliyay.
