Mohamed Salah ayaa mar kale shaki geliyay mustaqbalkiisa Liverpool ka dib markii uu soo jeediyay inuu maalin uun ka ciyaari doono horyaalka Spain.
Weeraryahanka Liverpool ayaa dhowr wareysiyo siiyay warbaahinta Spain isagoo ka hadlay mustaqbalkiisa xilli wadahalada qandaraas kordhinta ee Liverpool ay hakad ku jiraan ugu yaraan ilaa iyo xagaaga.
Xiddiga reer Masar ayaa hore u soo bandhigay sida uu uga careysan yahay inaan wax horumar ah laga sameynin wadahalada, iyadoo wakiilkiisa uu fariin dahsoon oo la xiriirta xaalada ciyaaryahanka soo dhigay baraha bulshada.
Waqtigaan, ka hor kulanka wareega sideed dhamaadka Champions League wuxuu wareysi siiyay jariirada Madrid ka soo baxdo, isagoo la weydiiyay haddii la joogo waqtigii uu ka tagi lahaa Liverpool.
“Aniga iguma xirna. Waan arki doonaa waxa dhaca laakiin waxaan jeclaan lahaa inaan ka hadlin haatan” ayuu ku jawaabay Mohamed Salah.
Laakiin wuxuu hoosta ka xariiqay inuu doonayo inuu u wareego horyaalka Spain oo uu ka ciyaaro La Liga. Markii la weydiiyay haddii uu doonayo inuu ka dheelo Spain, wuxuu ku jawaabay:
“Waxaan rajeynayaa inaan sannado badan kale sii ciyaaro. Maxaa diidaya? Cidna ma oga waxa dhici doona mustaqbalka sidaasi darteed, haa waa laga yaaabaa maalin uun.”
Salah ayaa ka warqaba murankii ay dhalisay wareysigii uu hadda ka hor siiyay warbaahinta Spain, sidaasi darteed wuxuu isku dayay inuu si diblumaasi ah uga jawaabo su’aalaha la xiriiray mustaqbalkiisa.
