Kabtanka xulka qaranka Poland ahna weeraryahanka kooxda Bayern Munich ee Robert Lewandowski ayaa dhaawac lagaga saaray liiska xulkiisa ee ka qayb qaadanaya kulamada isreeb-reebka koobka aduunka ee ay hadda kooxaha Yurub ciyaarayaan.
Lewandowski ayaa markale ku jira qaab ciyaareedkii ugu fiicnaa noloshiisa isaga oo xilli ciyaareedkan 47 gool kusoo dhaliyay 41 kulan oo uu usoo ciyaaray qarankiisa iyo kooxdiisaba.
Lewandowski ayaa laba gool kasoo dhaliyay kulankii ugu dambeeyay ee xulkiisu ciyaaray waxaana hadda hubaal ah inuu seegi doono kulanka Poland iyo xulka qaranka Ingiriiska dhex maraya Arbacada.
Warbixin rasmi ah oo ay hadda xidhiidhka kubadda cagta Poland soo saareen ayay ku sheegeen in Lewandowski uu ku laabanayo kooxdiisa Bayern isla markaana uu halkaas ku heli doono daawayn dheeri ah.
Warbixinta FA-ga Poland ayaa sidoo kale lagu sheegay in dhaawaca Lewandowski oo ah mid jilibka midig ahi uu qaato inta badan shan ilaa tobban maalmood si looga soo kabto taas oo ka dhigan inuu maqnaan karo kulanka go’aamin kara horyaalka Bundesliga ee RB Leipzig.
Waxa la filayaa in Lewandowski uu diyaar u noqon doono kulanka Champions League ee ay Bayern Munich toddobaadaka dambe la yeelan doonto Paris Saint-Germain.
