Magaalada Muqdisho waxaa xalay ka dhacay kulan abaabulkiisa kasoo bilawday Xildhibaanno & Senataro kasoo jeeda Dowlad Goboleedyada Puntland & Galmudug oo ugu dambeyn isu gacan-geliyay Siciid Deni & Axmed Qoor-Qoor oo is khilaafsanaa.
Ilo xog ogaal ah ayaa Axadle u sheegay in saacadihii lasoo dhaafay Muqdisho lagu qabtay kulamo looga hadlayay sidii la isugu keeni lahaa Madaxda Dowlad-Goboleedyada Puntland Siciid Cabdullaahi Deni & Galmudug Axmed Cabdi Kaariye Qoor-Qoor.
Sida Axadle ay heshay, xogta khilaafka waxa uu sii xoogeystay kaddib hadal jeedintii Deni 22-kii Febaraayo 2021 uu ka jeediyay Garoowe oo muddo saacad ka badan ka hadlayay arrimaha siyaasadda si gaar ah Shirkii Dhuusamareeb (4).
Qoor-Qoor ayaa aad u dhibsaday hadallada qaar, maadaama uu lahaa martigelinta Madaxda Federaalka & Dowlad Goboleedyada, u kala dab-qaadista Farmaajo, Deni & Axmed Madoobe oo muranka ka dhashay is qab-qabsigooda ugu dambeyn lagu kala tagay.
Labada Madaxtooyada ayaa ka aamustay faah-faahinta waxyaabaha sida gaarka ah ay ku heshiiyeen labada dhinac, balse ilo kala duwan ayaa xaqiijiyay in is afgarad uu dhexmaray Siciid Deni & Axmed Qoor-Qoor.
Kulamada labada dhinac ayaa sii soconaya ilaa inta ay kasoo saarayaan warsaxaafadeed lagu muujinayo waxyaabaha ay ka heshiiyeen labadaan madaxweyne Goboleed ee khilaafkooda ay ku baxeen Xildhibaannada & senatada ku metala Federaalka.
