Khadka dhexe ee kooxda Barcelona ee Miralem Pjanic ayaa si cad saxaafada uga hor muujiyay sida uu uga xun yahay in macalinkiisa Ronald Koeman uusan isaga siinayn fursadii uu mudnaa xilli ay caawa Champions League kaga hortagayaan kooxdiisii hore ee Juventus.
Pjanic oo 60 Milyan oo euro ku qiimaysan ayaa suuqii xagaaga usoo wareegay dhinaca Camp Nou waxaana dhinaca kale ee Allianz Stadium ka degay Arthur Melo oo isaguna 72 Milyan oo euro ku qiimaysnaa.
Bilawga nolosha Pjanic ee Barcelona ayuu saameeyay xanuunka Korona Fayras oo laga helay bishii August waxaana uu ilaa haatan 10 kulan oo horyaalka La Liga ah kaga soo bilawday mid kaliya isagoo shan kulan bedel ku yimid.
Haatan Pjanic oo u warramayay wargeyska Talyaaniga ah ee La Gazetta dello Sport ayaa qirtay inuusan fahmayn sababta uu tababare Koeman u ciyaarsiin la’yahay walow uu si wanaagsan u tababarto si fiicana u diyaar garoobo.
Xiddiga xulka qaranka Bosnia ayaa yidhi “Waxay ahayd inaan ciyaaro intaas in ka badan waanan doonayaa inaan ciyaaro, daacad ahaantii anigy ma fahmayo sababta aanan u ciyaarin”
“Waxaan doonayaa inaan ciyaaro intaas in ka badan, waan ogahay waxaan bixin karaa intaas wax ka badan, waxaanan qabtay wax wanaagsan markasta oo uu tababaruhu isoo xushay, ma garanayo waxa kale ee aan samayn karo, waxaan u tababartaa si wanaagsan waxaanan diyaar u ahay inaan in badan ciyaaro”
Pjanic ayaa kusoo bilawday dhammaan shanta kulan ee ay Champions League ka ciyaartay Blaugrana balse ka cabanaya fursad la’aanta kulamada horyaalka La Liga.
Barca ayaa qaabkii ugu xumaa tan iyo 1987/88 ku bilaabatay horyaalka iyagoo wakhtigan booska 9-aad kaga jira miiska kala sarreynta.
