Real Madrid ayaa Salaasada habeen dambe waxay waddanka Ukraine kula ciyaari doontaa Shakhtar Donetsk iyagoo u baahan inay kusoo laabtaan dariiqa guusha kaddib khasaarihii xanuunka badnaa ee kasoo gaadhay ciyaartii Alaves.
Los Blancos oo ay dersin ciyaartoyda muhiimka ahi dhaawac kaga maqan yihiin ayaa xili ciyaareedkan kusoo dhex jirtay dhibaatooyin badan oo horyaalka LaLiga iyo Champions League intaba ah, taas oo keentay inay mar kaalinta ugu hoosaysa kaga jiraan Group-kooda ka hor intii aanay sare ugu soo kicin labadii guulood ee xidhiidhka ahaa ee ay ka gaadheen Inter Milan.
Toddoba dhibcood oo ay haysato ayay Real Madrid ka heshay Borussia Monchengladbach oo barbarro ay la gashay iyo labada guulood ee Inter Milan, hase yeeshee ciyaartii furitaanka Champions League ayay ku bilaabatay guul-darro ay Shakhtar Donetsk ugu xambaarisay garoonka Alfredo Di Stefano.
Real Madrid oo kaalinta labaad kaga jirta Group-keeda ayna ka horreyso Borussia Monchengladbach ayaa waxay maanta u safraysaa magaalada Kiev ee waddanka Ukraine, halkaas oo ay ku sugayso Shakhtar Donetsk.
Zinedine Zidane ayaa kooxdiisa ugu yeedhay Sergio Arribas oo ka mid ah da’yarta oo kasoo muuqday ciyaartii Anoeta ee horyaalka LaLiga.
Victor Chust ayaa isaguna ka mid noqday 21ka ciyaartoy ee uu Zinedine Zidane usoo xushay kulankan iyadoo uu dhimay tiradii 24-ka laacib ahaa ee uu sharcigu u ogolaa oo uu kusoo koobay 21 kaliya.
Ciyaartan xaasaasiga ah ayaa waxa dhaawac kaga maqan oo aanay Real Madrid heli doonin kabtankeeda Sergio Ramos, Dani Carvajal, Fede Valverde, Eden Hazard iyo Alvaro Odriozola.
Laakiin Karim Benzema ayaa culayska ka fududaydiyey Zidane oo taam u noqday ciyaartan, inkasta oo aan la hubin haddii uu dheeli doono.
Waxa kale oo aan qayb ka ahayn ciyaartoyda Real Madrid, weeraryahanka Luka Jovic oo aan wali kasoo kabanin xanuunka Korona Fayras.
Liiska ciyaartoyda Real Madrid ee u safraya Ukraine
Goolka: Thibaut Courtois, Andriy Lunin, Diego Altube
Difaaca: Eder Militao, Raphael Varane, Nacho, Marcelo, Ferland Mendy, Victor Chust
Dhexda: Toni Kroos, Luka Modric, Casemiro, Martin Odegaard, Isco, Sergio Arribas
Weerarka: Karim Benzema, Marco Asensio, Lucas Vazquez, Vinicius Jr, Mariano Diaz, Rodrygo Goes
