Xigasho: Hay’adaha amniga waxay ka digayaan qaraxyo ismiidaamin ah oo galaya Caasimadda Muqdisho – Axadle

Muqdisho (Axadle) – Ilo wareedyo ka tirsan laamaha amniga ee Soomaalida iyo ajaanibta ee Xarunta Xalane ayaa sheegay inay heleen xog muhiim ah oo dhanka amaanka ah oo la xiriirta qaraxyo ka dhici kara Caasimadda Muqdisho.

Wararku waxay muujinayaan in ismiidaamiyeyaal ka yimid gobolka Shabeellada Hoose ee koonfurta Soomaaliya ay soo galeen Caasimadda Muqdisho si ay u fuliyaan weeraro ismiidaamin ah

Saraakiisha amniga ayaa Axadle u sheegay in ilaa sideed qof ay soo galeen magaalada ayna qorsheynayeen inay is qarxiyaan.

Xogta ayaa sidoo kale muujineysa in bartilmaameedku yahay xarumaha militariga ee wasaaradaha, hoteelada iyo maqaayadaha. Waxaa sidoo kale la sheegay in kooxdaasi ay weerari karaan goobaha ay dadku isugu yimaadaan.

Xarakadda Al-Shabaab ayaa sheegatay mas’uuliyadda duqeymahaasi oo ay ku dhinteen in ka badan 100 qof oo ka mid ah dadka ku dhaqan Caasimadda Muqdisho.

Maalmo ka hor ayaa qoraal ay soo dhigeen baraha bulshada koox ka tirsan dadka degan Xalane oo ay uga digayaan qaraxyo ka dhaca Caasimadda Muqdisho oo xilligan wajaheysa fasax aad u mashquul badan oo ah Ciidul Fitriga.