Xukuumada Gobaladda Waqooyi oo ka hadashay imaanshiyaha Garaad Jaamac ee Laascaanood

Isniin, January, 23, 2023 (AX) –  Xukuumada Gobaladda Waqooyi ayaa imaanshiyaha Garaad Jaamac Garaad Cali 15 sanno kadib ku yimid Laascaanood ku tilmaantay nin gurigiisii yimid.Wasiirka Wasaarada Biyaha Gobaladda Waqooyi Cali Xasan Maxamed (Cali Mareexaan), oo Sahan TV wax ka waydiiyay socdaalka garaadka, ayaa ku tilmaamay in uu garaadku yahay nin gurigiisii yimid, taasina ay caadi tahay.

“Jaamac Garaad Cali waa garaad reer Laascaanood ah, oo garaad guun ah oo taariikh dheer leh, waana Jamhuuriyada Gobaladda Waqooyi garaadadeeda ugu waa wayn ayuu kamid yahay, markaa haduu Laascaanood soo gaadhay waa nin magaaladiisii yimid, hadii lasoo dhaweeyayna dadkiisii ayaa soo dhaweeyay” ayuu yiri Cali Mareexaan.

- Advertisement -

Cali Mareexaan ayaa garaadka iyo garaadada kale ugu baaqay in ay ka shaqeeyaan nabadgalyada isla markaana meel looga soo wada jeesto cidkasta oo nabadgalyo daro abuuraysa.

Garaad Jaamac Garaad Cali oo 15 sanno kadib maanta Laascaanood soo gaadhay, ayaa soo dhawayn balaadhan kala kulmay shacabka Laascaanood iyo tuulooyinka ku dhow dhow, garaadka ayaa aad uga soo horjeeda gooni isu taaga Gobaladda Waqooyi.

Garaadada kusoo qulqulaya Laascaanood ayaa badankoodu aaminsan in la sameeyo maamul hoostaga dowlada Soomaaliya, oo xaruntiisu tahay Laascaanood.

Maamulka Khaatumo ee garaadadu ay ku taamayaan ayaa dhowr jeer oo hore suuragaliwaayay, madaama Gobaladda Waqooyi iyo Puntland labadooda midna anay ogolayn, hadaba waxa laga war sugayaa waxa kasoo baxa shirka odayaasha dhaqanku dhawaan ku yeelanayaan Laascaaanood.

This website uses cookies to improve your experience. We'll assume you're ok with this, but you can opt-out if you wish. Accept

Privacy & Cookies Policy