Xukumadda Soomaaliya oo ka hadashay xayiraada Al-shabaab kusoo rogtay Shirkadda Hormuud

Talaado, December, 27, 2022 (AX) – Iyadoo saacadahii lasoo dhaafay ay soo baxayeen warar sheegaya in Al-Shabaab ay xayiraad kusoo rogtay dhaqdhaqaaqa gaadiidka iyo shaqaalaha Shirkadda isgaarsiinta ee Hormuud Telecom ayaa waxaa arintaasi faahfaahin dheeraad ah ka bixiyay Afhayeenka Wasaaradda Gaashaandhiga Soomaaliya Cabdullaahi Cali Caanood.Afhayeen Caanood oo wareysi gaar ah siiyay laanta afka Soomaaliga ee VOA-da ayaa sheegay iney ka war heleen in kooxda Shabaab ay xayiraad kusoo rogeen Shirkadda Hormuud Telecom oo ka mid ah  shirkadaha isgaarsiinta ee gudaha dalka ka howlgala.

Wuxuu sheegay in kooxda ay horay u burburiyeen anteenooyinka xarumaha isgaarsiinta Hormuud oo ku kala yaala gobolada Hiiraan, Galgaduud iyo Shabeellaha Dhexe oo uu xusay in kooxda ciqaab ahaan u burburiyaan anteenooyinka Shirkada oo ay isticmaalaan shacabka Soomaaliyeed.

- Advertisement -

“Meelaha ay anteenoyinka Shirkadda Hormuud ka burburiyeen Shabaab waxaa ka mid ah Qaayib iyo Dhisiq qurunle, Moqokori, Yasooman, Tardo, Masaajid Cali Gaduud, Daarusalaam, Aadan Yabaal, Juxaay, Alkowsar kuwaas oo ah deegaano ku kala yaala Galgaduud, Hiiraan iyo Shabeellaha Dhexe, waxaana adeegyadaas ay burburiyeen horay kasii dhisaayay Shirkadda Hormuud” ayuu yiri Afhayeen Caanood.

Afhayeenka ayaa sidoo kale tilmaamay in ciidamada dowladda Soomaaliya ay isticmaalaan isgaarsiin u gaar ah, hayeshe culeeska ugu badan ee adeegyadaasi ay la kulmaan dadka shacabka iyo Shirkadda Hormuud.

“Waxay u burburiyaan anteenoyinka si aanan xogtooda iyo meelaha ay ku dhuumaleysanayaan u wadaagin sirdoonka ciidanka iyo dadka Shacabka ah, waa niman u taagan dhibaateynta dadka Soomaaliyeed ee shacabka ah oo ay kala dagaalamayaan horumarka iyo nolosha” ayuu yiri Jenaraal Cabdullaahi Cali Caanood.

Majirto wali wax war ah oo kasoo baxay dhanka Shirkadda isgaarsiinta Hormuud oo ku aadan wararkan sheegaya in kooxda Al-shabaab ay xayiraad kusoo rogtay dhaqdhaqaaqa gaadiidka iyo Shaqaalaheeda.

This website uses cookies to improve your experience. We'll assume you're ok with this, but you can opt-out if you wish. Accept

Privacy & Cookies Policy