Khamiis, Nov 17, 2022-Ciidanka dowladda iyo kuwa deegaanka oo howlgalo qorsheysan ka sameeyay deegaano ka tirsan gobolka Hiiraan

Khamiis, November, 17, 2022 (AX) – Ciidamada dowladda Fedaraalka Soomaaliya gaar ahaan kuwa sida gaarka ah u tababaran ee Danab oo kaashanaya ciidamada dib u xureynta deegaanka ayaa saacadahii la soo dhaafay howlgalo qorsheysan ka sameeyay deegaana dhowr ah oo dhaca jiinka Wabiga Shabeelle oo u dhaxeeya magaalooyinka Baledweyne iyo Halgan ee gobolka Hiiraan.Deegaanada ciidamada howlagalada ka sameeyeen ayaa ah deegaano dhawaan Al-shabaab kula dagalaameen ciidamada iskaashanaya, kadib markii Shabaab ay doomo kaga soo talaabeen wabiga Shabeelle dhanka galbeed oo ay wali ku sugan yihiin ciidanka shabaab.

Ciidamada ayaa si gaar ah howlgalada uga fuliyay deegaanada Cabdi Cagweyn, Dhagax xoor, Booco iyo Burdaar oo todobaadkii hore uu ka dhacay dagaal xoogan oo geystay khasaare isugu jira dhimasho iyo dhaawac kala gaaray labada dhinac.

- Advertisement -

Saraakiisha Ciidamada Kumaandooska DANAB ee howlgalka hoggaamineysay ayaa warbaahinta u sheegay ineysan la kulmin wax iska caabin ah oo kaga yimid dhanka dagaalamayaasha Ururka Al-Shabaab, islamarkaana ay burburiyeen Saldhigyo ay ku lahaayeen deegaanada u dhaxeeya Magaalooyinka Beledweyne iyo Halgan ee gobolka Hiiraan.

Saraakiisha ayaa sidoo kale waxay sheegeen in mudadii ay ku guda jireen howlgalada iney soo saareen miinooyin dhowr ah oo ay Al-shabaab ku aaseen wadooyinka muhiimka ee u dhaxeeya Baledweyne iyo Halgan.

Howlagaladaan ayaa imaanaya, iyadoo dagaalamayaasha Al-shabaab ay bilaabeen iney ka dagaalamaan deegaanka ku yaala jiinka Wabiga Shabeelle, kadib markii laga soo saaray inta badan deegaanada ku yaala bariga gobolka Hiiraan ee ka fog wabiga Shabeelle ee dhexmara gobolka Hiiraan.

This website uses cookies to improve your experience. We'll assume you're ok with this, but you can opt-out if you wish. Accept

Privacy & Cookies Policy