Hogaamiyaha Soomaaliya oo si adag uga hadlay dagaalkii ka dhacay magaalada Baydhabo

Sabti, December, 24, 2022 (AX) – Hogaamiyaha dowladda Fedaraalka Soomaaliya Xasan Sheekh Maxamuud oo ka hadlay dagaalka ka dhacay magaalada Baydhabo ee xarunta gobolka Baay ayaa si adag u sheegay inaan la aqbali karin in waqtigaan la joogo dagaalo sokeeyo iyo kuwa lagu dhibaateynayo shacabka ay dhacaan deegaanada maamul goboleedka Koonfur Galbeed Soomaaliya.

Hogaamiye Xasan Sheekh Maxamuud ayaa ugu baaqay dhinacyada ku dagaalamay Baydhabo ee ku kala aragtida duwan siyaasada iney wadahadal iyo isfaham ku dhameystaan khilaafka ka dhex jira, isagoona xusay in dowladda Soomaaliya ay u taagan tahay ilaalinta masuuliyadda ka saaran nabadgalyada iyo dib u heshiisiinta.

- Advertisement -

“Qoriga dhulka dhiga oo gogosha isugu imaada oo is warsada waxa idinka qaldan iska toosiya oo ninka idin anfacaayo heysta haddii uu joogo, haddii uu maqan yahay keensada oo fursad hala siiyo dadka waana aaminsanahay inaan dhib kale jirin, siyaasad lee la isku hayaa, siyaasadda hala dhowro, madaxda jirta hala dhowro, kuwa hamiga leh hala dhowro, 32 sano kadib in aan qori isu qaado aad ayay u xun tahay, wixii talo iyo waano aan ka geysan karno waan ka geysaney walina waan ka geysaneynaa” ayuu yiro madaxweynaha Soomaaliya Xasan Sheekh Maxamuud.

Hogaamiye Xasan Sheekh Maxamuud ayaa sidoo kale sheegay in shacabka Soomaaliyeed ay leeyihiin hal cadaw oo loo baahan yahay in xooga lawada saaro sidii looga xureyn lahaa dalka iyo deegaanada ay ka joogaan Koonfur Galbeed, islamarkaama ay tahay in laga gudbo kala aragti duwanaanta siyaasada iyo dhibaatooyinka kasii dhalan kara.

“Dowladda Fedaraalka waxay xoog, caqli iyo Xoolo leedahay waxay isugu geyneysaa sidii xal loo heli lahaa, hal cadaw ayaan leenahay, Baydhabo intana ugama bixi kartid oo 20 KM dhinac kama aadi kartid macquul ma aha, meel Shabaab joogaa waxba ma jiro, walaalaha waxa aan leeyahay cadawga dhankaan ayuu naga jiraa ee dhankaas nagama jiro” ayuu yiri Hogaamiye Xasan Sheekh Maxamuud.

Hadalka madaxweynaha Soomaaliya ayaa imaanaya, iyadoo shalay dagaal khasaare geystay uu ka dhacay gudaha magaalada Baydhabo ee xarunta gobolka Baay, kaasoo salka ku haayo kala aragti duwanaasho siyaasadeed oo la xariirta mudo kororsiga madaxweynaha dowlad goboleedka Koonfor Galbees Cabdicasiis Laftagareen.

This website uses cookies to improve your experience. We'll assume you're ok with this, but you can opt-out if you wish. Accept

Privacy & Cookies Policy