Baarlamaanka Fedaraalka Soomaaliya oo Maanta meel mariyay Miisaaniyadda sanadka 2023

Arbaco, December, 28, 2022 (AX) – Xildhibaanadda labada Aqal ee Baarlamaanka Fedaraalka Soomaaliya ayaa Maanta si wadajir ah u ansixiyay Miisaaniyadda dowladda ee sanadka 2023-ka, taasoo ay mudanayaasha Baarlamaanka ka doodayeen kulamadii ugu dambeeyay.Kulankaan oo ay goobjoog ka ahayeen guddoonadda iyo ku xigeenada labada Aqal ee Baarlamaanka Soomaaliya ayaa ka dhacay xarunta Golaha Shacabka ee Villa Hargeysa, waxaana Xildhibaanada laba Aqalka dood dheer kadib Miisaaniyada dowladda ee sanadka 2023 meel mariyay oo ogol ug codeysay 172 mudane, waxaana ka aamusay hal mudane.

Wadarta guud ee Miisaaniyadda sanadkan ayaa gaartay $973,985,805, iyadoo Miisaaniyadda sanadkan loo kordhiyay xarumaha danta guud sida xarumaha Caafimaadka dowladda, Waxbarashada iyo hay’adaha amniga ee dalka.

- Advertisement -

Maalin ka hor ayay aheyd markii Wasiirka Wasaaradda Maaliyadda Soomaaliya Cilmi Maxamed Nuur uu hortgay kulanka labada Aqal, kaasoo mudanayaasha ay wax ka weydiiyeen su’aalo la xariira Miisaaniyadda dowladda ee 2023 oo ay kasoo shaqeyeen guddiga maaliyadda ee labada Gole.

15-kii bishi lasoo dhaafay ee Novembar ayay aheyd markii shirka Golaha Wasiirada Soomaaliya oo uu shir guddoomiyay Raysal wasaaraha Xukuumadda Xamse Cabdi Barre ay ku meel mariyeen Miisaaniyadda dowladda ee sanadka 2023, taasoo ka kooban dakhli gudaha ah iyo deeq oo gaareysa $967.7 Milyan oo Dollar.

Miisaaniyadda 2023 ayaa xoogga lagu saarayaa sare u qaadidda dakhliga gudaha oo hadda la rajeynayo inuu ka sare maro sanadihii la soo dhaafay, iyadoo la rajeynayo inuu gaaro $283.3 Milyan oo dollar, halka sanadka dhamaadka ah uu ahaa $247 milyan oo doolar.

Wasiirka Wasaaradda Maaliyada Xukuumadda Fedaraalka Soomaaliya Cilmi Maxamuud Nuur ayaa dhankiisa  Xildhibaannadda labada aqal ee Baarlamaanka dowladda Federaalka Soomaaliya uga mahadceliyay ansixinta Miisaaniyadda sanadka 2023-ka.

Gabagabadii guddoomiyaha Golaha Shacabka Sheekh Aadan Maxamed Nuur Madoobe ayaa ku dhawaaqay in Miisaaniyadda sanadka ay ansax tahay, isagoona guddoonka iyo xildhibaannada labada aqal, guddiyadda Maaliyadda ee Baarlamaanka uga mahadceliyay dadaalkii dheeraa islamarkaana ay ku bixiyeen juhdi iyo wakhti badan si dadka iyo dalka loogu adeego.

This website uses cookies to improve your experience. We'll assume you're ok with this, but you can opt-out if you wish. Accept

Privacy & Cookies Policy