Wasiir Juxa: Soomaaliya, maanta ayay kasii kala qeybsanaan badan yahay labo sano ka hor

 
Arbaco, May, 15, 2024 (AX) – Hogaamiyaha Soomaaliya Xasan Sheikh Maxamuud ayay maanta u buuxsantay muddo labo sano ah oo uu dalka hoggaaminayo, lagasoo bilaabo markii xilkaan loo doortay 15-kii bishii May ee sanadkii 2022.
Wasiirka arrimaha gudaha Waqooyi Bari, Cabdi Faarax Siciid Juxa, ayaa isagoo taas ka falceilnaya wuxuu boggiisa Twitterka kusoo qoray, in labada sano ee madaxweyne Xasan Sheikh Maxamuud uu dalka hoggaamiyo uu dalku galay kala qaybsanaan weyn.
“Marka loo eego labada sano ee madaxweyne Xasan Sheikh, Soomaaliya, waa kasii kala qeyb sanaa badan tahay labo sano kahor maanta,” ayuu yiri Juxa.
Wasiir Juxa waxa uu sheegay midnimada Soomaaliya in lagu badbaadin karo oo lagu cayimin karo, nidaamka isku haynta dalka ee federalism-ka ama waxa loo yaqaano Confederal oo ah dalku inuu noqdo dawlado madax-banaan oo ku midooba hal dowlad.
Juxa waxa uu aaminsan yahay, in madaxweyne Xasan Sheikh uu ka shaqeynayo inuu dalka ka hirgaliyo dowlad dhexe oo ku jirta gacan qura.
Si kastaba ha ahaatee, Waqooyi Bari iyo dowladda federaalka Soomaaliya ayaa muddo ku dhow labo sano khilaafkoodu taagan yahay, welina laguma guulaysan in xal laga gaaro. Waqooyi Bari waxay dhawaan sheegtay in aanay jirin dowlad Soomaaliyeed oo ay aqoonsan tahay.


This website uses cookies to improve your experience. We'll assume you're ok with this, but you can opt-out if you wish. Accept Read More