Xisbiga UCID oo eedaymo u jeediyay Booliiska Gobaladda Waqooyi

Arbaco, Ogosto, 3, 2022 (AX) – Xisbiga mucaaradka Gobaladda Waqooyi ee UCID, ayaa Booliiska Gobaladda Waqooyi ku eedeeyay in uu baal maray xeerka booliiska lagu dhaqo.Xogeeyaha Warfaafinta ee Xisbiga UCID Yuusuf Kayse Cabdillaahi, oo warbaahinta kula hadlay magaalada Hargaysa, ayaa booliiska ku eedeeyay in ay galeen tacadiyo ka dhan ah xuquuqda aadanaha, intii uu socday bannaanbixii 9 Juun, isla markaana ay sharciga ka talaabsadeen.

“Qodobka 33aad ee xeerka booliisku waxa uu leeyahay ‘ma bannaana fal-danbiyeed kasta oo ka dhan ah bini’adamnimada, sida jidh-dilka, maskax-dilka iyo dhamaan fal-danbiyeedyada’, waxad markhaati ka tihiin iyada oo saraakiili ay dumar keeni caarka ahaa ay naaska kala dhacayaan laag” ayuu yiri Kayse.

Waxa uu sheegay in xeerka booliisku uu hay’adda booliiska farayo in anay ku lug yeelin karin, arrimaha siyaasada isla markaana, ay dhexdhexaad u tahay dhamaan xisbiyada siyaasada Gobaladda Waqooyi.

“Booliiska Gobaladda Waqooyi oo naga mudan sharaf iyo qadarin waxa noo dhexeeyaa waa xeerka … cutubka 2aad faqradiisa 5aad waxa uu leeyahay booliisku waa u adeegaha bulshada isaga oo ka madaxbannaan siyaasad, dhexna u ah xisbiyada qaranka” ayuu yiri Kayse.

Waxa uu sheegay in marka xeerka booliiska la eego, xubin kasta oo booliis ah oo lagu helo danbi jidh-dil ah in xeerku ku ciqaabayo 5 sanno ilaa 10 sanno, waxaana uu codsaday in sharciga la horkeeno, xubnihii ciidanka ka tirsanaa ee dhibaatooyinka gaystay bannaanbixii 9 Juun.

This website uses cookies to improve your experience. We'll assume you're ok with this, but you can opt-out if you wish. Accept Read More