Puntland oo dhaqaale xumo awgeed u sixi la’ imtixaankii shahaadiga ee dugsiayda sare

Khamiis, July 14, 2022 (AX) – Wasiirka waxbarashada maamulka Puntland, Cabdullaahi Jaamac Xasan, ayaa sheegay inay la’yihiin dhaqaale ay ku saxaan imtixaanka shahaadiga ah ee fasalka 4-aad dugsiyada sare.Wasiirka waxbarashada ayaa hadalkaan ka sheegay, xilli uu maanta warbixin siinayay barlamaanka Puntland oo ugu yeeray in laga dhegaysto waxqabadka wasaaraddiisa.

In ka badan shan kun oo arday oo sannadkan dhammaysay dugsiyada sare ayay arrintaan caqabad ku tahay, kuwaas oo isku diyaarinayay inay jaamacaddaha ku biiraan.

Wasiirka waxbarashada waxa uu sheegay in dhaqaalaha laga qaado waallidiinta ardayda, kaas oo dhan celcelis ahaan 46%, uusan ku filnayn howsha sixitaanka imtixaanka.

Hay’adaha Puntland ka taageeri jiray sixida imtixaanaanadka, ayaa gebi ahaanba joojiyay taageeradoodii dhaqaale, taasoo ahayd 40%, sida uu sheegay wasiirka waxbarashada Puntland.

Puntand, waa maamulka kaliya ee ka madax bannaan imtixaanka ay qaado xukumadda federalka Soomaaliya. Sidaas oo ay tahay sannadihii ugu dambeeyay, Puntland waxay la kulmaysay caddaadis ku aadan inay ka qeyb gasho imtixaanka xukumadda ay qaaddo.

This website uses cookies to improve your experience. We'll assume you're ok with this, but you can opt-out if you wish. Accept Read More